唔同類的股票用唔同的離場策略。對於用黎收息的股票 (唔係成長股或者「煙頭投資法」所選的資產股), 唔寄望佢股價爆升的, 我們可以用一個頗簡單的準則: 就係股價升、盈喜/盈警公佈、業績公佈減派息時, 導致新的股價的預計息率跌至某個數就走人。
　　
　　例如, 市面上有其他超過4%的股息回報的投資, 但風險比上述股票低得多(4%純粹係一個例子, 可以因應個人情況而更改), 低過4%股息回報對於我黎講唔再吸引, 就準備離場。
　　
　　簡單例子：一隻買入價時息率約8%的股票, 而家股價升了一倍, 又或者公佈盈警話盈利將減少一半, 咁新的息率將會大約得翻4%, 咁就算到價離場時刻。股價之後仲會唔會升無人知道, 一般人都只係靠估(例如10多年前的牛市30000多點時, 大把專家、散戶都調高目標價, 越估越高... 30000就估上32000, 去到32000又估會上35000... 咁搞法永遠唔駛離場, 短炒變長揸... 到最後結果係點唔駛多講...)。本來計劃用來收息的投資, 睇返實際股息回報黎作買賣決定, 已經係最理性、客觀同合理的做法。
　　
　　再重申一次, 呢個方法筆者只會用在高息股。高息股亦較少是大牛市的當炒股。當高息股唔再高息, 市面上又有更好選擇, 點解仲要為左長線而長線持有？
　　
　　根據以往經驗, 在大牛市時中途離場後股價都多數都會繼續升, 所謂「賺少左」, 但係快則幾個月, 慢則可能三幾年後, 其實又可能可以重新以高息率的低價格買入。
　　
　　(注意: 呢個只係分享作為散戶的一套, 並非咩大行大戶、基金經理的方法, 只供參考。）