牛市一般會經歷三期，當去到牛市第三期, 股票的基本因素, 公司賺唔賺錢, 派唔派息, 都唔夠市場上的參與者的情緒影響咁大。大漲小回, 甚至係利淡新聞都當好消息。市場上面有主題、有資金, 氣氛樂觀, 個市就係咁升。
　　
　　過往幾次大牛市點發展, 或者有咩特徵, 我本書寫左好多篇幅, 呢度唔多講了。
　　
　　既然響牛市三期, 咁應該點做呢?
　　
　　大升市會否短期內幾個月就玩完? 我覺得唔會。市場尚未見到有咩主題/因素、潛在主題/因素能夠推倒大牛市。所以重申一次, 因未見有明確能推倒牛市的因素, 我不是由看好變看淡, 而只是中立Neutral, 暫時亦不打算造淡。但不會再因為堅持係牛市, 而不斷唱好, 或者坐定定咩都唔做。牛市未玩完但相信較大調整在所難免。
　　
　　以價值投資黎講, 似乎手上唔少公司的股價已經反映左價值。
　　
　　牛三最瘋狂升得最急的時期可能未到, 但個人做法會係留意個別情況而開始逐步減持。
　　
　　呢幾年黎除左有一兩次講過話手上高息股股價升得太多後, 股息率不再吸引而減持收息股/換馬外, 應該無提過話要減持, 而今次先係第一次。
　　
　　按計劃最先講byebye的應該係股價無咩跟大市升過的公司 (有不少公司股價比歷史高位仲係低近一半, 無乜點升過)。
　　
　　點解? 唔驚佢地追落後咩? 我都驚佢地會響我講完byebye時追落後, 但係個市升左咁耐兼破埋歷史高位, 兩三年來都未見佢地追落後, 點解會覺得而家先黎追落後? 而且, 響泡沫爆破/大跌市時, 落後的股票通常都會跌埋一份。
　　
　　而最後留響手的應該會係一堆用作收息而基本因素良好的公司 (我的準則係市盈率低於10, 市賬率低於0.8, 息率6-10%)。
　　
　　預算直到歷史市盈率去到約20倍 (與現水平距離約5000點), 應該清了接近一半倉。留返的一半倉就差唔多係上年所賺的淨利潤, 輸曬都唔會肉痛, 就由得佢繼續放風箏。
　　
　　升市莫估頂, 我一定唔會沽清, 因為牛三最瘋狂升得最急的時期, 幾日可能回報百份比已達雙位數。但回調/下跌的時候亦會好急, 所以實在好難捕捉到近頂位的幾日。
　　
　　但係好多股評人而家話賣左買唔返, 我一笑置之。兩年前又唔見佢地咁講?
　　
　　市盈率真係去到20倍的話, 我唔信兩年內都可以保持到20倍的水平。兩年內我唔信無機會再買返, 不過到時可能係大市轉向, 俾你買得返都唔想要。
　　
　　總結一句: 君子不立危牆之下。